” ولا بتأهل ولا بتدرب ومستقبلي بيضيع”.. لاعب الزمالك يشن هجوم حاد علي مجلس الإدارة
شن ” يوسف حسن” لاعب نادي الزمالك هجومًا حادًا علي مجلس إدارة الفارس الأبيض، بسبب عدم الوقوف معه بعد تعرضه للإصابة.
حيث نشر يوسف حسن عبر حسابه الرسمي علي موقع التواصل الاجتماعي فيس بوك قائلاً:”انا هتكلم بس مش عايز جمهور الزمالك يزعل مني ف اي حاجه، انا بسبب اللي بيحصل معايا ده هبطل كوره بالشكل ده انا لا بتأهل ولا بتدرب ومستقبلي بيضيع”.
وتابع:” انا الكورة هي شغلي وأكل عيشي ومش عارف انا أذنبت في ايه ولا عملت ايه علشان اللي بيحصل معايا ده، عمر م حد شاف مني حاجه وحشه ولا شاف اني بعمل مشاكل أنا ديما فحالي،بس الي حصل فيا مش قليل عارف الناس ممكن متصدقش الي بيحصل معايا بس وحياه الايام المفترجه دي”.
واضاف:” اكيد انتو عارفين علي موضوع العملية و كده ومحدش كان راضي يعملها من الإدارة، وعملتها بعد مجهود كبير جدا جدا بعد 6 شهور قاعد ف البيت، وبتحصل معايا نفس الحاجه بعد م الاداره الجديده وعدوني هنوديك علاج طبيعي انت لعيب مهم وانت وانت وانت”.
وأكمل:” اول شهر ودوني لي دكتور علاج طبيعي اسمو د/خالد الشناوي، رحت شهر و اتنين والنادي مدفعش الفلوس ل الدكتور العلاج الطبيعي، طبعا انا اتكسفت اني اروح تاني العلاج الطبيعي أنا بقالي 3 شهور يعتبر قاعد ف البيت،وحياه ربنا وحياه ربنا م حد عبرني ب مكلمه تلفون ولا حد بيرد عليا أصلا “.
وواصل حديثه قائلاً:” حسبنا الله ونعم الوكيل ف كل ظالم،اول مره اشوف كده اول مره أشوف ظلم ب عيني فعلا، عمري محصلي كده ف حياتي، كل م اروح لحد يقولي اتكلم مع الاداره اتكلم يقولولي مش عارف اي مفيش حد وقف معايا نهائي بس غلطتي اني مكنتش بطلع اتكلم، انت جيبني بفلوس مش فلوس قليله مفروض تقدرني مفروض،لاعيب منتخب مصر”.
واختتم:” لي بيحصل معايا انا ف نادي كبير واسم كبير وجمهور الزمالك عارف انا بحبهم ازاي بس انا اتظلمت كتير وغلطتي اني كنت ساكت مش عايز اتكلم بفكر ف مصلحتي لما لقيت الناس كلها بتهاجمني انا ومفكرني انا الي قاعد ف البيت بمزاجي، محدش يزعل مني اي حد زعلتو حقه فوق دماغي انا بحب جمهور الزمالك”.
