علق ” علي لطفي” حارس مرمي الفريق الأول لكرة القدم بالنادي الأهلي عن الفيديو المنتشر له بتعدي إداري نادي الهلال السوداني عليه ، عقب نهاية المباراة.
وعقب نهاية مباراة الأهلي والهلال السوداني اعتدي أحد افراد الجهاز الإداري من نادي الهلال بالضرب على ” علي لطفي” .
وكتب علي لطفي عبر حسابه الشخصي علي موقع التواصل الإجتماعي انستجرام:” السلام عليكم انا مكنتش حابب اتكلم عن الموضوع ده خالص بس حالة الحب الى شوفتها من جمهور مصر المحترم كله وجمهور النادي الاهلي بالذات الي هيفضل فرق راسي وصاحب الفضل عليا وعلي كل واحد بيتشرف بانتمائه للنادي الأهلي”.
وتابع:” وبخصوص اللقطه الي انتشرت علي مواقع التواصل الاجتماعي حابب اقول بس اني مش ضعيف واقدر اخد حقي من اي حد وانا طول عمري متربي علي اني احترم المحترم واشيله فوق دماغي و الغير محترم اعرف اتعامل معاه كويس اوي واخد حقي بالذوق او بالعافيه بس انا في اللقطه دي مكنتش بمثل نفسي بس انا بمثل مصر و كبير افريقيا وحديث العالم الكروي كله بعد الاداء المشرف بشهادة جميع كل نقاد الكره في العالم امام احسن نادي العالم ريال مدريد “.
واضاف:” كنت عارف ان العيون كلها هتبقي علينا لاسيما آن دي اول مباراه بعد كاس العالم للانديه وكمان هي اول مباره في مستهل مشوارنا الافريقي بس انا زي ما قولت الاجواء كانت مشحونه وعارف ان اي رد فعل مني ممكن يتاخد بشكل تاني خاصتا اننا طول عمرنا متربيين أن مصر السودان شعب واحد ووطن واحد ولكن حالة الشحن الي قابلناها هناك من قله موتوره كانت غير طبيعيه من لحظة وصولنا وهتافات الجماهير المعاديه لينا طوال اللقاء بالرغم من ان الكاف اعلن انها مباراه بدون جماهير ولكن دي مش منطقتي وفي مجلس اداره قوي عارف يحافظ علي حقوق النادي الاهلي”.
واكمل:” وقادر علي حماية كل حقوق النادي ولكن اي رد فعل مني كان هيتاخد بموقف مش سليم وانا عارف ان مجلس الاداره بقيادة الخلوق الاسطوره كابتن محمود الخطيب هيجيب حق كل لاعب وفرد في منظومة الكوره”.
واتم حديثة قائلاً:” واخيرا حابب تاني اكرر شكري و امتناني بتقدير جمهور النادي الاهلي العظيم علي رسائل الدعم الي قابلتها وحابب برضه أكرر اني اعرف اجيب حقي كويس بس مقدرش اعمل حاجه تضر سمعة النادي الكبير الي بلعب له وبلدي صاحبة الرياده الافريقيه دائما و ابدا شاء من شاء وابي من ابي”.
